सडक तथा खानेपानी लगायतका पुर्वाधार मेरो मुख्य प्राथमिकता : फर्सुराम पान्डे

गुल्मी 

नेकपा एमाले प्रदेशसभा गुल्मीका उमेद्वार फर्सुराम पाण्डेले गाउँगाउँमा पुगेको सडक तथा खानेपानी लगायतका पूर्वाधारको सुधार आफ्नो मुख्य प्राथमिकता अन्तर्गत रहेको बताउनुभएको छ । ग्रामीण भेगसम्मै पुगेका सडक तथा खानेपानीको संरचनामा स्तरोन्नती गरी तीनको न्यायोचित वितरणमा ध्यान दिनुपर्ने उहाँको भनाई छ । गाउँमा भइरहेका पूर्वाधार विकासका प्रारम्भिक काम र त्यसको स्तरोन्नतीका विषयमा आफ्नो टिमले विगतका वर्षदेखि नै गहन अध्ययन गरिरहेको भन्दै पाण्डेले संभावित श्रोत र प्राथमिकताका आधारमा स्पष्ट खाका तयार गरेको पनि जानकारी गराउनुभयो ।

गुल्मीदरबार गाउँपालिकाका विभिन्न वडाहरुमा भएको एक कार्यक्रममा उहाँले घरघरमा रोजगारी सिर्जना गर्न सकिने विषय आफ्नो राजनैतिक नारा मात्र नभई वर्षौँदेखिको संकल्प रहेको समेत उल्लेख गर्नुभयो । उत्पादनमा युवालाई प्रोत्साहन गरी दीगो आयआर्जन गर्न सकिने सम्भाव्यता र त्यससँग सम्बन्धित गतिविधीमा लामो समय काम गरिरहेको छु, पाण्डेले भन्नुभयो “यो मेरो कुनै बनावटी नारा नभएर अनुभवको सदुपयोग गर्ने संकल्पको विषय हो ।” त्यसका लागि नीती निर्माण तहमा आफै पुग्नुपर्ने निचोडका साथ निर्वाचनमा होमिएको बताउनुभयो । नेकपा एमालेका एजेण्डा र आफ्ना प्रतिबद्धतालाई सचेत मतदाताले अनुमोदन गर्नेमा आफु विश्वस्त रहेको उहाँको भनाई थियो ।