शैक्षिक संस्थामा राजनीतिक हस्तक्षेप, खस्किदो गुणस्तर सङ्गै बढदो अराजकता

(सबिन के.सि )

बिद्यालय ज्ञानको थलो ,शिक्षक शिक्षिका ज्ञानको सम्वाहक । शिक्षाको पवित्र मन्दिरमा झांगिएको राजनितिको अराजक झुन्डले प्रशासन र शिक्षक दुबैलाइ डर र त्रासमा काम गर्न वाध्य परेका छन । दुई दिन अघि आर आर क्याम्पसमा परिक्षामा चिट चोर्न नपाएको रिसमा शिक्षक माथी विद्यार्थीको आक्रमण यहि झुन्डको उपज थियो । त्यसो त कतै शिक्षकबाट बिद्यार्थी पिडित कतै विद्यार्थीबाट शिक्षक पिडित बनेका घटनाहरु बारबार आउने गरेका छन । केही समय अगि शहरकै एक स्कुलमा होमवर्क नगरेको निहुमा शिक्षकले बिद्यार्थीलाई हातै भाचिने गरि पिटेको घटना बाहिर आयो । दुई दिन अघि मात्र पोखरामा न्यु लाइफ़ स्कुलका ६ वर्षीय बालकले ओच्छ्यानमा पिसाब गर्‍यो भनेर होस्टलकी वार्डेनले बालकको यौनांगमा रबरले बाँधेर सुताउँने गरेको कुरा बाहिर आयो। यी घटना क्रमलाई नियाल्ने हो भने हाम्रो शैक्षिक यात्रा कस्तो र कहा जादैछ भन्ने बुझ्न कठिन नहोला । अझ सरकारी स्कुल कलेजको हबिगत हेर्दा लाग्छ यहाँ ज्ञान होईन पार्टिको सिद्धान्त बाड्ने गरिन्छ । स्कुल कलेजमा प्रत्यक दिन जसो पार्टिगत क्रियाकलाप बढ्दै जानू यो हाम्रो शैक्षिक चुनौतिको पाटो मात्र होईन भविश्यमा हुन सक्ने शैक्षिक दुर्घटनाको कारक पनि हो भन्दा फरक नपर्ला ! शैक्षिक सस्थामा प्रत्यक पार्टिको संगठन बिस्तार अनि सोही अनुरुप स्कुल प्रशासन र शिक्षक शिक्षिका चल्नु पर्ने यो कस्तो अभ्यास । हुदा हुदा अब त परिक्षामा चिट चोर्न नदिए शिक्षक हरु सजायको भागिदार बन्नु पर्ने भए । राजनितिक संरक्षणमा यस्ता अराजक हर्कत गर्ने बिद्यार्थी जमातले परिवार, समाज, समुदाय र रास्ट्रलाई कस्तो योगदान देला ? ज्ञानलो भुमी, अनुशासनको जननी बिकासको पहिलो सुचक बिद्यालयमा हुने गरेका यावत घटनाले हामी एक युग पछि छौं भन्ने आभास मात्र गराएको छैन, राज्य, प्रशासन, राजनिती र न्यायिक नियमावलिलाई समेत खिल्लि उडाएको छ । समग्र विश्व बिकासको एउटा स्वर्णिम युगमा प्रबेस गर्दै गर्दा हामी राजनितिको तितो हस्तक्षेप बाट शैक्षिक सस्थालाइ समेत सुरक्षित राख्न सकिरहेका छैनौ भने बिकासको दुर दृष्टि कसरी सम्भव होला र ! प्रशासन र न्यायलय राजनितिको मुट्ठिमा हुदा शैक्षिक सस्थामा हुने गरेका गम्भीर घटनाका दोशी सजिलै उम्कने गरेका नजिर हामी सामु प्रस्टै छ जसले गर्दा बार बार यस्ता घटना दोहोरिरहेका छन । राजनितिको यस्तो सिधा असर बाट आखिर हामीले कस्तो शिक्षा प्राप्त गर्ने ? कता गइरहेको छ हाम्रो युवा मानसिकता ? परिवर्तनलाई साकर पार्ने आसा र भरोसा युवा पुस्तालाई राजनितिबाट टाढा राख्दै ज्ञानको मन्दिर शैक्षिक सस्था स्वतन्त्र चल्नु पर्ने होईन ? त्यसो त शिक्षक शिक्षिकाबाट बिद्यार्थी माथी हुने गरेको यातनालाई समेत केलाउदा यी सबै पक्षलाई नैतिक, व्यवहारिक, मानवीय पाठ पढाउन नितान्त आवश्यक देखिन्छ।